Да се зајакнат младите за да имаат подобри можности за вработување и активно учество на пазарот на труд е целта на регионалниот проект “Зајакнување на млади преку нови можности”, кој беше промовиран од страна на СОС Детско село во соработка со Херман Гмајнер Фонд Германија.

Проектот ќе се имплементира во Северна Македонија, Србија, Косово, Албанија и Босна и Херцеговина со поддршка на германското Министерство за економска соработка и развој и Херман Гмајнер Фонд Германија.

“Овој проект е многу важен затоа што е регионална иницијатива која ќе се имплементира во пет балкански држави за да ги зголеми можностите за вработување за околу 1.600 лица. Преку проектот ќе се поддржат младите, но исто така, ќе се даде придонес целиот регион да работи заеднички за европската иднина и да ги промовира европските вредности во овие општества.  Со овој пристап и пред стартот на преговорите со Европската Унија, СОС Детско село во Северна Македонија ќе даде сериозен придонес во расчистување на начинот на креирање ново општество”, рече Н.Е Томас Герберих, амбасадор на Сојузна Република Германија во РСМ. Тој нагласи дека Германија ќе продолжи да го поддржува СОС Детско село во Северна Македонија.