На 22 јануари 1963 година, сојузниот канцелар Аденауер и претседателот де Гол го потпишаа германско-францускиот Договор за пријателство, познат како Елисејскиот договор, кој даде значаен придонес за историското помирување меѓу двете земји.

Надоврзувајќи се на овој Договор, сојузната канцеларка Ангела Меркел и францускиот претседател Емануел Макрон на 22 јануари 2019 година го потпишаа Договорот за соработка и интеграција во германскиот град Ахен. Со овој нов договор, кој ќе ги прошири веќе блиските односи меѓу Германија и Франција во економската, надворешната и безбедносната политика, во областите култура и образование, истражување и технологија, клима и животната средина, како и во однос на соработката меѓу граничните региони и невладиниот сектор, Германија и Франција сакаат заедно да се соочат со предизвиците на 21 век и да го унапредат својот ангажман за силна, суверена и демократска Европа.

По повод потпишувањето на Договорот, амбасадорите на Сојузна Република Германија и Република Франција, г-н Томас Герберих и г-н Кристиан Тимоние, поканија на проекција на германско-францускиот филм „Транзит“ во режија на Кристиан Пецолд, според истоимениот роман од Ана Сегерс, што ја раскажува приказната на еден Германец, кој за време на Втората светска војна поради националсоцијалистите бега во Франција.

Настанот беше организиран во соработка со Лоја Центар Тетово и Alliance Française de Tetovo.

По завршување на филмот, публиката беше поканета на дискусија на темата „Германско-француски Договор за пријателство во контекст на актуелните предизвици на Македонија и на регионот Западен Балкан.

Галерија